Biz imzaları yox, əsərləri dərc edirik...

Kölgən dünyaya ləkə salır... – Fərid Hüseynin yeni şeirləri
2334
18 İyun 2019, 14:31
  Artkaspi.az saytı Fərid Hüseynin yeni şeirlərini təqdim edir:
 
  Axan qatar

  Alnını söykəmisən şüşəyə,
  səni mənzil başına aparan
  qatarın pəncərəsindən
  geriyə axır işıq dirəkləri,
  geriyə axır evlər,
  bağlar, maşınlar...
  Sanki yanından keçən
  hər şey geri qayıdır...
  Dönüş biletim sabahadır, Gülcamal...
  Dönüş biletim sabahadır, Gülcamal...
  Dönüş biletim sabahadır, Gülcamal...
 
 

  Günah suları

  Yadıma düşən bu axşamda
  yenə də köksümdəsən,
  Adını çəkirəm,
  o adı ki, yanında nifaq ağacı bitib,
  ki, nə dincəlmək,
  nə sərinliyinə arxalanmaq olar kölgəsində.
  O ağac öz ömrüncə
  ancaq qorxulu bir yuxunun,
  qovğalı bir günün,
  zəhərə dönən şirin tikənin
  hekayətini dinləyər
  və sənin yalanlarını
  yarpaq günlərinin arasında ədalətlə bölər.
  Amma sənə bütün bunları demək olmaz,
  yox, olmaz,
  vallah, olmaz.
  Desəm, o saat deyərsən ki,
  hər şeydə bir hikmət var
  və sənin növbəti yalanına
  qoca həqiqət qənim olar.
  Sən yad evlərdə o ağacın
  dibinə günah suları tökürsən,
  və kölgən dünyaya ləkə salır,
  adının qoxusu yayılır
  tanındığın hər yerdə.
  Mənsə üzü yadımda qalmayan
  adamları "çoxaldıram" ömrümdə.
 
  Ziyarət küləyi

  Sevgi, çıx canımdan,
  tükətdin məni, ey xəyal xəstəliyi.
  Mən ki çökmüşəm
  çiynimdən qarğış ehtirasıyla asılmış
  ağrıların yükündən.
  Daha usanmışam,
  hər gün yorğunluğumun
  ziyarətinə gəlməkdən.
 
  Əllərin "bərpası"

  Əlində tutduğun bir kağızın
  şəklini çəkmişəmmiş haçansa, -
  indi o vərəqdən heç nə oxunmur.
  Yaxınlaşdırıb,
  lap yaxınlaşdırıb
  baxıram dönə-dönə,
  qoxun dörd dolanır başımda...
  O şəkildə ancaq iki barmağın oxunur,
  və mən onlara inanıb
  əllərini bərpa edirəm yaddaşımda...
  O vaxt ki, dilim "hə, hə" deməkdən,
  başım razılıq əlamətiylə yellənməkdən,
  gözüm oxşar sətirləri oxumaqdan yorulur,
  o vaxt ki, özüm olmaqdan başqa çarəm qalmır,
  onda o şəkli açıb saatlarla baxıram
  və şəkildəki barmaqların tuşlanır,
  eyni ölümə kədərləndiyimiz günə,
  sən demə, yadların itkisi
  daha möhkəm bağlaya bilirmiş
  adamları biri-birinə...
  Gözlərin yox,
  saçların yox,
  gülüşün yox,
  küsməyin yox,
  ancaq barmaqların var o şəkildə...
  Və o şəkil
  sənin "yoxluğunun yuxusu"du...
  Tapdaq bir şəhərin
  işğaldan bir gün əvvəlki fotosudu...
 
  Hazırcavab təqvim
 
  Can verən bir təqvim var masamın üstə,
  sonuncu yarpağını sirkələyir ilin küləyi.
  Bu təqvim daş-tərəzidi:
  bir gözündə gələcəyi çəkir,
  o biri gözündə ötən günləri.
  Bu təqvimin aylarına ağlamaqdan doymuş,
  bir adamın səsi hopub,
  əlamətdar günləri
  yadların təsəllisiylə "qırmızılanıb".
  Beləcə adlamaqdadır bu ilim.
  Öz ürəyilə danışa-danışa
  mənasız bir hazırcavaba dönüb bu təqvim.
  Qoy, dişi ağrıyan uşaq
  bu təqvimə bir sap bağlasın,
  çıxarsın canındakı ağrını.
  Qoy, bir qəhrəman alsın
  ötən günlərin əlindən
  xatirələrin ağ bayrağını.
  Mənsə daha xoşbəxt bir günün
  yatmış saatında qalım.
  elə səslə çağırsın ki, məni gələcək,
  qəfildən adımın gözəlliyinin fərqinə varım.
 
  Rəqabət cədvəli

  Qəlbim dəyişib libasını,
  daha başqa rəqabət cədvəlləri tutub,
  sakitliyim bir körpüdür,
  qəzəb çayından keçirir məni.
  Özümə mənasız suallar vermirəm daha,
  Soruşmuram: "O, ev paltarında da belə gözəldimi,
  ya da səhər tezdən oyananda?".
  Qəlbin tox vaxtı sevdiyinə bənzər
  insanlar da çıxmaz rastına...
  Tərəddüdlər tərk edib məni,
  insafla insafsızlıq arasında vıyıldamır küləyim...
  Qəfəsə bülbülün
  xatirəsini danışır ürəyim...
 
 

  Təkrarın yalnızlığı

  O sözləri ki, başqalarına da söyləmişəm,
  sənə də dedim
  və o sözlərim ömürlük sənin oldu.
 
  O yollardan ki, mən çox gəlib-keçmişəm,
  sənlə də keçdim
  və fayton dayandı...
 
  O əqrəblər ki, zamanın üstündən çox yol eləyiblər, -
  vaxt birgəlik günlərimizi yaşadı
  və saatlar yatdı...
 
  Bu şeiri bir şairin kitabının
  ağ səhifəsinə yazıram,
  sözlərimi kim oxusa onundu,
  mən oxusam sənin...
 
  edebiyyatqazeti.az